Journal

我從來冇諗過，有一日自己會想整一個播放器。更加冇諗過，一個連寫程式都唔識嘅人，竟然會開始研究點樣整一個屬於小人仔嘅「Tube」。

搵播放器 app 唔成功之後，我開始諗，我自己可唔可以整一個 YouTube 出嚟呢？當我同我老公提起嗰陣，佢第一句就話：「嘩，要寫 code 㗎喎！好大工程，你做唔到㗎！」之後佢自己走去上網搵咗一陣，跟住俾咗條 link 我，同我講：「嗱，呢個人寫咗個 app 去扮 YouTube，你直接攞嚟用就得啦！」

我去睇吓個 app，原來係一個爸爸幫自己個小朋友整嘅。個 layout 有少少似 YouTube，佢仲放埋一啲自己睇過，同埋覺得對小朋友有益嘅影片上去。因為佢都俾 YouTube 推薦影片困擾，所以想幫其他家長，乾脆公開咗個 app 出嚟。我當時真係覺得有希望，以為終於可以過返平靜咁用 YouTube 嘅日子，點知當我介紹個 app 俾小人仔時，佢睇咗一陣就話：「呢啲片都唔係我鍾意睇嘅片！」我個夢想又破滅咗。

之後我又開始諗，咁呢個世界究竟有無一樣嘢，係唔使寫 code，但又可以做到一個封閉、安全、只俾小人仔睇我檢查過影片，同時又有 YouTube 感覺嘅播放器呢？我就係咁不停上網查，之後我發現有一樣嘢叫 no-code 平台，可以自己選播放器 layout，改顏色，又可以用 YouTube 影片縮圖。我自己本身用電腦都只係做文件、整報告，寫程式對我來說完全係另一個世界。雖然個平台話唔使寫 code，但其實每個選項我都唔明佢講乜，我只可以一邊查，一邊試。

好多時都係等小人仔瞓咗，我先可以靜靜地慢慢研究。我開始研究點樣整到個 layout 似 YouTube，用返差唔多嘅紅色，將啲片分好類，點入 playlist 之後，就可以見到成個 playlist 啲片。而我最想做到嘅，係個首頁要有種好似 YouTube 推薦影片咁嘅感覺，可以一路碌落去，見到片，片，片。當個影片數量夠多，成個首頁真係可以一路碌都係片。

之後我又研究到，可以隨機咁幫啲片洗牌，即係就算係同一堆片，小人仔每次打開首頁，片嘅次序都會有少少唔同。我知道佢好鍾意 YouTube 其中一樣嘢，就係永遠好似仲有下一條片咁，所以我想保留返嗰種感覺。因為小人仔通常用 iPad 睇片，我又再下一城，播片嗰陣，片下面會再出一堆類似推薦影片咁嘅嘢，咁就可以一路碌落去，又係片，片，片。

最後，我就開始諗點樣俾呢個我整嘅播放路喺小人仔個世界出場。我用咗幾日時間同佢講，YouTube 壞咗，啲影片有問題，有時會跳啲佢驚嘅片出嚟，所以我專登整咗一個屬於佢自己嘅 YouTube。我問佢想叫乜嘢名，佢就幫個播放器改名做「AiGhost Tube」，至於點解叫呢個名，就只有佢自己先知。

當 AiGhost Tube 第一次喺小人仔部 iPad 出現，佢一見到熟悉嘅顏色、熟悉嘅 layout，可以一路碌落去都係片，片，片，想重播就重播，想停就停，想快就快，想揀其他就揀其他，而最重要嘅係，全部都係佢平時睇開、鍾意睇嘅片。之後佢開始不停同我講，想加啲咩題材落去，我就一路幫佢 update 個影片資料庫，慢慢加，慢慢加，我做咗一年，差唔多整理到成千條片。

AiGhost Tube 慢慢取代咗 YouTube，至少我終於唔使再一邊煮飯，一邊驚下一條片會突然跳啲乜出嚟嘞。

---

Screen Time 系列到呢度告一段落

如果你係由第一篇一路睇到呢度，多謝你陪我一齊走完呢段路。

呢七篇文章，記錄咗我點樣由一開始以為「收 iPad 就係世界大戰」，一路跌跌撞撞，去理解小人仔點解咁依附 YouTube，最後一步一步整出 AiGhost Tube。

如果你係第一次嚟，或者想重新睇一次成個故事，可以由第一篇開始閱讀。

1. YouTube 真係洪水猛獸？
2. 點解收 iPad 會變世界大戰？
3. 睇 YouTube 片唔係解悶咁簡單
4. 我開始發現問題不只是時間
5. 原來我每天都在人肉過濾影片內容
6. 我以為整理 playlist 就可以
7. 我開始整屬於小人仔嘅 「Tube」

後記

寫完呢七篇文章，我發現，我真正想寫嘅，其實唔係點樣同 iPad 或 YouTube 搏鬥。我亦唔係想放縱小人仔想點睇就點睇。

我真正想分享嘅，係點樣透過陪伴同觀察，慢慢理解小朋友點解會對一件事咁執著。當我開始明白背後真正嘅原因之後，原來好多問題，都可以用一個大家都舒服啲嘅方法去處理。

AiGhost Tube，只係呢段旅程其中一個結果。

之後我仲想繼續分享，我點樣整理影片、點樣建立影片資料庫、點樣一步一步砌出 AiGhost Tube，同埋一路試錯嘅過程。

如果你有興趣，歡迎繼續跟住我寫落去。

呢個故事完咗，但我同小人仔嘅故事仲未完。

我仲會寫更多我哋一路跌跌撞撞、一路試錯、一路成長嘅過程。

如果你想繼續同行，歡迎睇下其他文章。

---

下一步

如果你都想開始觀察自己小朋友，而唔係急住改變佢，可以去我整理好嘅 Resources 睇睇。

我會將一直以來試過、整理過，同埋真正用過嘅工具同方法，整理好後放喺 Resources，希望可以陪你由觀察開始。

第一個工具

Tool 001｜先觀察，再下結論：今日真係 Screen Time 問題？

一份 5 分鐘嘅觀察工具，希望可以陪你由觀察開始，而唔係由假設開始。

當普通播放器都取代唔到 YouTube

我知道，YouTube 推薦影片根本控制唔到。如果繼續用 YouTube，就算我花幾多時間整理 playlist、封鎖頻道、清觀看記錄，最後都只會繼續同 YouTube 個推薦系統搏鬥。於是我開始諗，如果問題係 YouTube 本身，有無方法可以完全唔用 YouTube？

我開始試唔同影片播放器 app。有啲 app 可以將下載咗嘅影片分類放入唔同資料夾，想睇唔同題材就自己開資料夾選片；有啲就可以排到好似 Netflix 咁，一打開就見到全部影片縮圖，又可以分類，想睇邊條片就點邊條片。我仲將之前整理好嘅影片逐條放返入去，心諗，如果可以完全避開 YouTube，咁推薦影片嘅問題應該都會一齊消失。

但真正開始俾小人仔用之後，我先發現，事情根本唔係我想像咁簡單。

其他播放器入面放嘅，其實同 YouTube 係同一批影片，內容完全無分別，但只要唔係 YouTube，小人仔就會覺得唔對路。佢會不停問我點解啲片唔同咗，但明明根本係同一批影片；有時打開 app 睇兩眼，就立即退出，又或者一路想搵返 YouTube 個 app。喺我眼中，只係換咗一個播放器，但對小人仔來說，好似成個熟悉嘅世界突然變咗。

慢慢我開始留意，原來小人仔依附嘅，好像已經唔只係影片本身。

佢鍾意嘅係 YouTube 嗰種熟悉感。佢要同樣顏色、同樣 layout、同樣可以一路碌，一路見到片，片，片；睇完可以重播，唔想重播又可以立即揀下一條，又有 playlist，又有好多縮圖，總之好似永遠都有下一條片等緊佢。

我最害怕嘅，其實正正就係呢樣。YouTube 永遠都有下一條片，退出 playlist 有推薦，返到首頁又有推薦，個世界好似永遠都唔會停。但對小人仔來說，佢反而鍾意呢種感覺，只要一路碌，就一直有片；只要一路睇，就唔使停。

直到嗰一刻，我先真正明白，點解我試咗咁多播放器都取代唔到 YouTube。一直以來，我以為自己要解決嘅係影片問題，但原來小人仔依附嘅，好像已經唔只係影片，而係整個 YouTube。

上一篇：原來我每天都在人肉過濾影片內容

下一篇：我開始整屬於小人仔嘅「Tube」

YouTube 推薦影片原來比 screen time 更難處理

當我開始發現問題不只是 screen time，而是 YouTube 裡面的內容之後，我就開始想盡辦法，去過濾小人仔會睇到的影片。但我後來先發現，真正難處理的，未必只是影片本身，而是 YouTube 那種不停推薦下一條片的演算法。

小人仔好鍾意睇 Super Mario 遊戲影片。佢見到啲 gamers 過關，好有一步一步完成任務嘅感覺，音樂又有節奏，畫面色彩豐富，啲角色又好生動，好符合小人仔鍾意有情節發展、有規律、可控制嘅思維模式。

於是我開始搵一啲唔刺激、無 gamers 講嘢嘅純過關片，整咗一個私人 playlist 俾佢睇。佢會一路跟住 Mario 跳，會拍手，會笑，好沉浸喺自己嗰個小小世界裡面。

開始嗰段時間，其實一切都好似如我安排。我煮飯嗰陣，小人仔就睇 Mario 影片，我以為自己終於搵到一個比較安全嘅方法。

但過咗兩三個星期，有一日，我突然聽唔到小人仔平時睇 Mario 時會有嘅笑聲同拍手聲，成間屋好靜，只係聽到有人講嘢。我立即行過去睇，見到小人仔好專心咁睇緊一條片。

條片裡面都有 Mario 公仔，但內容變成用各種方法去破壞 Mario，例如放入微波爐、用石頭打、用水浸，去測試佢有幾「硬淨」。

我當下個心沉一沉。

條片表面睇落好似實驗片，甚至有種「研究」感，但成件事其實係將破壞、傷害，同「好玩」包裝埋一齊。我最驚嘅唔係小人仔即刻學，而係呢啲觀念會慢慢變成一種「正常」。

我當時好驚，但我知道自己唔可以突然大反應咁停片。對小人仔來說，如果無足夠時間預備就突然停 iPad，本身已經會引發崩潰。如果我再表現得太激動，反而可能會令佢對條片更加好奇。

於是我只可以好自然咁帶佢離開條片，同佢講，如果打爛啲公仔，以後就無得玩。我哋想知道公仔有幾硬淨，其實有好多方法，但放入微波爐好危險，會爆炸，唔可以學。

之後我以為，只要刪除觀看記錄、封鎖頻道，就可以解決件事。

但我慢慢發現，YouTube 嘅演算法根本唔係咁運作。

只要小人仔睇過一次類似影片，YouTube 就會不停推更多類似內容俾佢。甚至因為其他人嘅公開 playlist 入面有嗰個 YouTuber 嘅片，就算我封鎖咗個頻道，啲片都仍然會不停跳返出嚟。

我開始變得好緊張。

小人仔又想繼續睇 YouTube，我就要放低手上所有嘢，坐喺旁邊一路睇住佢睇緊乜，有咩推薦影片跳出嚟，仲要不停同佢解釋邊啲內容有問題。

慢慢地，我發現自己晚晚都要清觀看記錄、封鎖頻道、封鎖影片。有時一晚要花一個鐘處理 YouTube。小人仔睇得越多，我就要清得越多，只要有一晚無清，之後個啲推薦片就會變得好混亂，更多唔適合嘅片又會開始不停跳出嚟。

本來幫到我喘息嘅 iPad，慢慢又變成咗另一種消耗。

我開始發現，原來我每天都在人肉幫小人仔過濾內容。

上一篇：我開始發現問題不只是時間

下一篇：我以為整理 playlist 就可以解決問題

Screen time 背後真正困難係 YouTube 推薦內容

當講到 screen time，很多家長第一時間想到的，通常都是「睇太耐」。但後來我慢慢發現，對我來說，真正困難的好像不只是時間，而是 YouTube 裡面那些我無法控制、亦無法預測的內容。

雖然 YouTube 幫到我好大忙，俾到我時間同空間去完成工作，甚至可以俾我喘一口氣，但日子耐咗之後，我開始遇到另一個更大嘅問題。

一開始，小人仔睇嘅影片其實都係我揀過、自己睇過覺得安全嘅 playlist。但當佢慢慢大個，就開始想自己控制選片。而 YouTube 對家長最唔友好嘅地方，就係家長其實好難真正做 screening。

就算我鎖定咗 playlist，每次播完影片之後，下面仍然會不停出現推薦影片。只要小人仔一按落去，就會進入一個完全不受我控制嘅世界。

最可怕嘅係，有啲片表面睇落好似俾小朋友睇，但當我認真睇內容，就會發現入面嘅價值觀、人際關係、說話方式，甚至世界觀，都未必適合小朋友。有啲內容好極端，有啲節奏快到連我自己睇都覺得好亂。就算 YouTube 有小朋友版，我都開始發現，裡面好多內容其實我並唔認同。

慢慢地，我開始察覺到，小人仔會講一啲同年齡唔太相符嘅說話，會出現一啲我從來無教過佢嘅行為。有一次，佢因為畫面太閃、太刺激，成個人情緒變得好激動。我想停 YouTube 等佢冷靜，但對小人仔來說，離開 iPad 本身已經好困難。結果變成，一方面係 YouTube 刺激到佢失控，另一方面，一停 YouTube 佢又會崩潰。

我第一次覺得自己好似被困住咗。

最後，小人仔尖叫、典地，足足持續咗兩個鐘。我當時真係好驚，亦好內疚，甚至有一段時間決定要完全戒 iPad。但現實係，我根本支撐唔到。有一日我病咗，真係無力再頂，最後又俾返 YouTube 小人仔睇。嗰一刻，我甚至覺得自己好似永遠都爭鬥唔過 YouTube 同 iPad，我係一個好失敗嘅媽媽。

但後來，我又開始發現另一樣嘢。

有時小人仔睇到適合嘅影片，佢其實會好平靜。佢會學到入面嘅內容，會同我講佢覺得有趣嘅事，會開始講故事，甚至會自己吸收到數學、英文、科學有關嘅知識。佢對影像吸收得好快，有時甚至唔需要人教，就已經會自己學到新事物。

我開始發現，問題好似未必只係「YouTube」本身，而係內容。

有啲影片會令佢刺激過度，有啲影片會令佢混亂，但有啲影片，反而會令佢平靜、投入，甚至變成一種學習。只要內容適合、節奏適合、唔太刺激，YouTube 對小人仔來說，有時甚至好似一個無形老師。

而由嗰陣開始，我開始意識到，我可能已經無辦法只靠「限制時間」去處理 screen time 問題。 如果我控制唔到 YouTube 嘅演算法，至少，我想開始自己過濾、自己整理，去知道小人仔到底睇緊乜。

上一篇：睇 YouTube 片唔係解悶咁簡單

下一篇：原來我每天都在人肉過濾影片內容

為什麼有啲小朋友咁難離開 iPad

Screen time、YouTube、iPad，很多時都會被理解成「沉迷」問題。當小朋友開始不停想睇影片、收 iPad 就崩潰，大部分人第一個反應，通常都係要限制時間、減少接觸電子產品。但後來我慢慢發現，小人仔對 YouTube 嘅依賴，好似未必只係「想睇片」咁簡單。

「沉迷」同埋「沉浸」，係我近呢一兩年開始慢慢思考嘅概念。

喺社交媒體、新聞、健康資訊入面，我哋成日都會聽到「小朋友沉迷電子產品」呢件事。家長最擔心嘅，通常都係學業問題、社交問題、視力問題、運動不足，於是大部分建議都係：唔好俾小朋友接觸、限制 screen time、或者不停安排其他活動，等小朋友放低電子產品。

對好多一般家庭嚟講，只要夠堅持、夠狠心，小朋友喊幾次，慢慢都會習慣時間到就收 iPad，再去做其他事情。

但去到小人仔身上，我開始覺得，事情好似唔只係「沉迷」咁簡單。

因為我要面對嘅 iPad 問題，比我原本想像中更加複雜。當時大部分時間都只有我一個人湊小人仔，面對一個不停需要我專注、做唔完嘅家務、連去個廁所都趕到七彩嘅生活，我最後都要接受，iPad 已經變成咗我其中一個湊囝助手。

煮飯嗰陣、沖涼嗰陣、我病嗰陣、甚至攰到連自己情緒都快控制唔到嗰陣，唯一可以暫時幫我安定小人仔、等佢唔好不停搵我、典住我嘅時間，就係佢睇 YouTube 嘅時候。

我知道，好多家長會覺得呢種做法係放縱，甚至會覺得我唔夠盡責。但有一段時間，我真係捱唔住。

而慢慢地，我亦開始發現，YouTube 對小人仔嚟講，好似唔只係「解悶」。

iPad 對佢來說，係一樣佢可以控制、可以觸摸、亦可以即時有反應嘅嘢。啲影片就好似一個花花世界，顏色好多、節奏好快，佢可以不停重複睇同一條片，又可以不斷跳去下一條片。最重要嘅係，YouTube 好似永遠都唔會停，一條片接一條片咁推俾佢睇，佢可以一直碌落去。

當佢一路睇片、聽音樂嗰陣，我開始覺得，佢好似進入咗另一個世界。喺嗰段時間入面，佢唔需要面對等候、唔需要面對轉換，亦唔需要面對我唔喺身邊嗰種焦慮。iPad 好似暫時取代咗媽媽不停全情投入陪伴嗰個角色。

開頭我一直以為，呢種狀態叫「沉迷」。

但後來我慢慢發現，小人仔似乎唔只係單純想睇片。

對佢來說，iPad 更似係一個佢可以掌握、可以預測、亦令佢覺得安全嘅地方。影片會不停延續落去，畫面、音樂、節奏都唔會突然停低，佢可以一直沉浸喺裡面。

而真正困難嘅，似乎唔係「睇片」本身，而係「轉換」。

我發現大部分小朋友都可以有開始、有終結，慢慢習慣時間到就停，再去做其他事情。但喺小人仔身上，每一次由 iPad 轉去另一樣活動，都好似卡住咗咁。當佢開始睇影片，佢就好似進入咗一個令佢覺得安定嘅世界，而當我要突然將佢拉返出嚟，對佢來說，好似唔單止係「收 iPad」，而係一下子失去咗嗰種佢可以掌握、可以預測嘅感覺。

我開始懷疑，令佢崩潰嘅，可能未必只係 screen time，而係當佢被迫離開一個令佢覺得安全嘅世界時，嗰種對「下一步會發生乜嘢」完全無法掌握的不安。

上一篇：點解收 iPad 會變世界大戰？

下一篇：我開始發現問題不只是時間

一個媽媽對 screen time、YouTube 與小朋友失控的觀察

Screen time、YouTube、iPad，對很多家長來說，都是一場長期拉鋸。尤其當小朋友一停電子產品就崩潰、尖叫，很多家長都會開始懷疑，到底是自己做錯了，還是 screen time 本身真的那麼容易令人失控。

收 iPad 變成世界大戰呢件事，由小人仔大概兩歲、第一次因為我要幫佢剪指甲而開 YouTube 開始，一路困擾咗我好多年。我試過跟專家建議的方法，二十分鐘 screen time，之後休息，再二十分鐘；每日限制總時間；用 timer；提早通知；建立規律。我明白背後原因，防止沉迷、保護眼睛、避免過度依賴，好似有好多小朋友都可以慢慢適應，但到小人仔身上，整件事就完全變成另一回事。

每次計時器響，小人仔就好似完全聽唔到。我同佢講要休息，佢會撥開我隻手。我試過氹，試過講道理，試過一齊 set timer，甚至試過話「喊就無 iPad」，但全部都無用。到最後，我往往只能夾硬攞走 iPad，然後就開始爆喊、典地、尖叫，有時甚至會對我動手。慢慢地，我發現佢一聽到「要休息啦」呢句說話，就已經開始發脾氣。

有一次，我真係跟足方法做。20分鐘 screen time，之後20分鐘崩潰；再20分鐘 screen time，之後再20分鐘尖叫。嗰一日，我重複咗呢個循環足足五個鐘，最後係我自己投降。我開始唔明，點解人人都話有效的方法，到我身上會完全行唔通？係咪我又做錯咗啲乜？定係我其實真係一個好失敗嘅媽媽？

但後來，我開始慢慢觀察另一樣嘢。我諗返自己，未有小人仔之前，我其實都好容易「煲劇」。明明只係想睇一集日劇，結果睇完一集，又想睇下一集，最後唔覺意就通宵。有時碌 Facebook 或者 IG，都只係本來想碌幾下，但碌吓碌吓，一抬頭已經過咗二十分鐘。

原來連大人都會咁。咁對一個仲未真正學識點樣停低、點樣抽離的小朋友來說，又會係點？

我開始懷疑，收 iPad 就失控，係咪未必只係「沉迷」咁簡單。如果小人仔本身對某些事情特別容易沉浸，特別難停落嚟，咁我係咪應該先理解，佢個小腦袋裡面，其實發生緊乜嘢？

上一篇：YouTube 真係洪水猛獸?

下一篇：睇 YouTube 片唔係解悶咁簡單

Screen time、YouTube、iPad，對很多家長來說，都是一場長期拉鋸。尤其當小朋友開始對影片產生強烈依賴，很多家長都會擔心：是不是睇太多？是不是電子產品令孩子失控？作為一個媽媽，我以前都以為問題只是「screen time 太長」，但後來我慢慢發現，真正令人疲累的，可能不只是時間。

專家又好，長輩又好，未做人父母嘅人又好，好多人都會話，小朋友唔應該睇 YouTube，唔應該太早接觸電子產品。就算真係要睇，都應該嚴格控制時間，只可以睇少少。

我未做媽媽之前，都曾經好堅定咁相信，我將來一定唔會俾囝囡玩 iPad，唔會俾 YouTube 佢睇。甚至有一段時間，我都會覺得，俾手機同 iPad 小朋友玩嘅父母，係咪有啲懶，或者唔夠盡責。

但到我真係做咗小人仔嘅媽媽，我先明白，有一樣嘢叫「身不由己」。

當我要煮飯、洗衫、做一堆永遠做唔完嘅家務，而屋企大部分時間都係我一個人處理，無人真正可以接手湊囝時，我先發現，要拉開一個小朋友一陣，其實可以好難。

小人仔一定要有嘢俾佢專注做。我試過俾玩具，一件又一件，但每件都只係玩一陣就唔想玩。佢真正想要嘅，其實唔係玩具，而係有人陪佢，有人引起佢嘅興趣，有人不停回應佢。當佢覺得悶，佢會唔舒服，會叫，會喊，最後甚至會崩潰。

我試過死忍，死頂，一邊趕住做家務，一邊趕住陪玩。一個鐘頭之內，可以來回客廳同廚房二三十次。但力氣，總有用完嘅一刻。

有時我病到喉嚨痛，都唔敢休息，因為仲要講故事，仲要陪玩，仲要回應「媽媽、媽媽、媽媽」。

到後來，有一次我只係想幫佢剪指甲，真係頂唔順，終於開咗 YouTube。我以為只係一次。但就係由嗰一次開始，小人仔開始日又要睇影片，夜又要睇影片。

最初，我都仲堅守限時，15分鐘。

嗰15分鐘，唔單止係小人仔嘅黃金時間，亦係我好耐都未試過嘅自己時間。我可以完整咁洗好菜，可以掠好衫，甚至可以安安靜靜去一轉洗手間。

有15分鐘聽唔到「媽媽媽媽」。
有15分鐘聽唔到尖叫聲。
有15分鐘我唔使不停諗，下一秒要用咩方法安定小人仔。

YouTube 就好似一個魔法放監咁，俾我終於可以回一回氣。

但15分鐘之後，情況往往慘過落地獄。一收 iPad，就係世界大戰。崩潰、尖叫、典地，所有事情都要停低，先處理一個已經失控嘅小人仔。有時要喊一個鐘先收。
有時幾個鐘，直到佢自己攰到停落嚟。

我當時真係唔明。點解 YouTube 會咁易放、咁難收？點解一睇就失控？點解明明只係15分鐘，之後可以變成幾個鐘嘅拉鋸？

我真係好攰好攰。

有一段時間，我覺得自己失敗咗。我本來想做一個唔靠 iPad、唔靠 YouTube 嘅媽媽，但最後，我都係俾咗 iPad 小人仔睇 YouTube。

後來我才慢慢發現，真正令事情失控的，未必只是「睇咗幾耐」。而係 YouTube 本身那種不停下一條、永遠不會結束的模式。對大人來說，可能只是「再看一條」。但對一個還未懂得停下來的小朋友，尤其是一個本身已經很容易沉浸在某件事裡的小朋友，那種感覺可能完全不一樣。

我開始明白，自己真正害怕的，其實不只是 screen time。而是那種我無法預測、也無法掌握下一條會出現什麼的感覺。

下一篇：點解收iPad會變世界大戰？