小朋友肚餓都唔食，我曾經以為只係挑食，後來先知事情唔係咁簡單。
以前我好鍾意煮嘢食。但生咗小人仔之後，煮嘢食簡直係另一種折磨。
小人仔由BB食奶開始已經好奇。開定坐暖嘅奶唔食，一定要食新鮮開嘅奶，但佢一發現肚餓，就要支奶立即到口，一秒都唔等得。我一路開奶，佢一路尖叫爆喊。最慘係晚上我啲家人要瞓覺，唔可以嘈醒佢哋，所以佢未停夜奶嘅日子，我簡直瘋狂，見夠鐘就係咁開奶，凍咗就又開另一支新，只要佢唔尖叫就得。
到咗大個啲可以加固，惡夢就開始。
我跟住書整一般BB會食嘅嘢俾佢食。煮完一大輪，佢食一啖，就唔食。試唔同煮法，唔食。試唔同食材，唔食。
咁佢係唔係只食奶呢？唔係。佢四個月開始厭奶，次次食幾啖就成支奶剩喺度。
唔食都算，但最攞命係佢係咁喊，叫肚餓。
人人見到佢都話：「點解佢咁瘦㗎？」
我每次同人講，要佢食嘢係件痛苦嘅事，人人都話：
「餓一兩餐就會食啦！」
「唔好俾佢揀，你整乜佢就要食乜！」
「小朋友係咁㗎啦！」
我都試過。
但佢唔開口食，就真係唔開口食。佢會崩潰，會不停叫肚餓，餓到面都白晒，但都唔食。
我可以點做呢？
唯有俾BB餅佢食。而佢就只係會食BB餅。
到佢連奶都唔再食嗰陣，佢就只會食剩意粉，同一款嘅餅乾。唔食肉，唔食綠色嘅嘢，唔食米。明明細個都食粥仔，但大大吓，一啲有米味嘅嘢都唔食。
到兩歲左右，明明會食粟米。點知有一次食完幾啖，無端端咳到嘔晒出嚟，之後就完全唔肯再食粟米。
好難得佢終於會食蒸瘦肉餅。點知有一晚佢食咗好多，臨瞓前突然之間嘔晒啲未消化嘅肉餅出嚟。之後，又唔再食。
有一次我哋食麥當勞。佢會食漢堡包塊肉，唔要醬汁，唔要青瓜，唔要塊包，同埋只食麥樂雞。
我以為有方向。
我試過自己整漢堡扒，同埋整麥樂雞。但無論我點整點試，佢都唔食。
佢只會食麥當勞買返嚟嘅。
只係嗰一種。
我開始覺得，我呢個媽媽，好失敗。
食飯呢件事，對我嚟講，好似開大細。一時食，一時唔食，整咗唔食，唔整又叫食。
我每日為咗食飯，都要諗，都要準備，都要整。
但結果，多數都係一樣。
肚餓要食嘢，唔係必然嘅事咩？
我當時一直以為，只要再試多啲方法，事情就會好返。
但原來，唔止食飯係咁。
當小朋友不停喊、扭計、點做都唔啱
