我曾經以為小朋友扭計係問題，後來先知可能係我理解錯咗。
小人仔細個成日喊。我睇書、睇資料，成日都話BB喊一定有原因，因為BB唔識講，所以只可以用喊去表達。我一直好相信呢套講法，所以我覺得，只要佢喊，就代表有問題，而我要做嘅事，就係搵到個原因，再令佢停喊。我一直以為，佢唔喊，先係終點。
所以我不停試。有人話要做睡眠訓練，我試。有人話唔好成日抱，我試。有人話要建立規律，我又試。佢一喊，我就覺得係我做得唔夠好，或者我做錯咗啲乜。其他人做到，點解我做唔到？我一路內疚，一路再搵方法，一路想快啲解決眼前嘅問題。
但而家回望返，小人仔其實唔係一般意思嗰種喊。
佢好敏感，會將自己嘅感覺同情緒放大，亦會遲咗好多拍，先一次過表達出嚟。佢最大嘅恐懼，係無安全感，而呢樣嘢，同佢出世時差不多難產嘅經歷有關。
但我當時完全無諗過。
我無諗過，佢嘅世界、佢嘅經歷、佢嘅特性，可能同一般小朋友唔一樣。我只係用人人都用到嘅方法，想處理眼前嘅喊聲。我勞心勞力，左試右試，但我有無諗過其他可能？有無試過唔係用大人，或者我自己嘅角度，走入佢嘅世界？
開頭嗰段困獸鬥嘅日子，我其實無好好反思。
直到有一日，我睇住其他小朋友玩，小人仔就自己一個拍住手掌，講自己故事。嗰一刻我突然覺得，小人仔可能有佢自己嘅世界。
我反轉頭諗，當一件事用常理處理唔到嘅時候，係唔係要全盆反轉嚟諗，再搵其他主流以外嘅資料？
我就由嗰陣開始，再重新出發，再重新認識我嘅小人仔。
我漸漸發現，我以為自己明白嘅，其實唔止一件。
有啲我以為小朋友理所當然做得到，原來當下做唔到，係有另一個面向。
以為佢唔肯行路，其實不是