當小朋友不停喊、扭計、點做都唔啱，我曾經以為問題在自己身上。
小人仔宜家7歲。回想起佢由BB到5歲嘅嗰段時間，我其實完全唔明佢想點。
佢會不停喊、扭計、拒絕，我做乜都唔啱。無論我點試，結果都係一樣。
係咪我做得唔夠好？
我做錯咗啲乜？
甚至會諗，係咪我懷孕嗰陣做錯咗啲乜。
我好似一直被佢拖住，無停過。瞓唔到，食唔到，成個人長期處於一種拉扯入面。
佢五個月大嗰陣，我連工都辭咗去湊佢。以前辛苦建立嘅事業，當時一下子全部無晒。
有時我會覺得自己好似一個失控嘅人，好廢，只係不停被困住，俾個仔纏住，但又無人可以幫到我。
有人會同情我辛苦，但亦有人會講：
「係囉，你鍾意生囝嘛。做媽媽唔係好開心㗎咩？」
我心入面其實有一句：唔係你諗嗰樣。
但我無講。
「讀咁多書做乜？咪又係湊囝。」
我想講嘅嘢太多，多到連開口都唔知點開始。
「做全職媽媽已經好幸福啦！都唔諗吓雙職媽媽仲慘啦！」
我只係覺得，身同心都好攰。
我開始唔想出街。
見到其他BB同小朋友，好似一切都好正常，但我個仔，完全唔一樣。
我望住小人仔喺度尖叫，崩潰，甚至對我動手，我都唔知點解同點處理。
辛苦到一個位，我連眼淚都流唔出。
我當時一直以為，只要我再做得好一點，事情就會好返。
我不停諗方法，想解決問題，但所有嘢都好似只係變成另一種拉扯。我同佢，都撐得好辛苦。
望住跳制同扭計嘅佢，我突然間會覺得好陌生。
甚至，有一段時間，我其實好討厭我個囝。
我後來先發現，原來唔止喊同扭計係咁。
食飯，原來都可以變成另一場拉扯。
小朋友肚餓都唔食
而我一直以為係扭計嘅事，可能又唔係我想像中咁。
以為佢扭計，其實不是
