探索自己育兒節奏
面對住一個一直都好似拒絕我嘅BB，我其實已經做過好多嘢。
我試過主動同佢玩、同佢講嘢，刻意製造互動，希望可以拉近，但件事冇變，有時甚至相反，我越用力，佢越快抽離。
做咗一段時間之後，我停一停，唔係因為我知道應該點做，而係我發現，再做落去，好似只係重複同一件事。
我反過來睇自己，發現自己一直都有一個好固定嘅思考方式，見到問題，就要即刻有答案，即刻處理。呢種習慣，其實同我以前做研究員好似，有問題，就去搵解決方法，不停試，不停改，只要做得夠多，總會有結果。
但對住小人仔，呢套方法行唔通。
我問自己，如果我唔再要即刻做啲乜，會點呢。
於是我唔再插手。我唔再急住同佢互動，唔再即刻解讀佢嘅反應，而只係觀察佢做緊乜，佢點樣玩玩具，開心會點，乜嘢會令佢卡住，乜嘢情況之下會發脾氣，佢作息其實係點樣。
我冇急住下定論，只係安靜咁喺佢身邊出現。
有啲過程，如果我唔介入，其實會自己走完；有啲細節，如果我唔急住解釋，反而會慢慢浮出嚟。
以前我係透過「做」去理解，但喺呢段時間，我只係睇。
呢個唔係一個方法，只係一個轉變。如果要理解佢，第一步未必係做，而係唔做。
小人仔出世之後，有一段時間，我其實一直有個好深嘅前設：我係佢媽媽，佢應該會自然跟我。
呢個唔係我特別諗出嚟嘅道理，而係一種好自然、幾乎唔需要懷疑嘅信念。好多人都會講母子連心，BB喺媽媽肚入面住咗咁耐，出世之後，應該會認得媽媽、跟媽媽、搵媽媽，對我嚟講，呢件事本來係唔需要證明嘅。
但小人仔就唔係咁。佢唔會主動搵我，我行入屋佢未必有反應，我抱佢佢有時會扭，有時我坐喺佢附近，佢好似當我唔存在。呢啲情況唔係一次半次，而係反覆出現。出現得多，我開始有一個念頭，我冇同人講過，但我自己其實有咁樣諗過：佢係咪唔要我？
呢個理解其實好自然，因為大人世界一直都係咁運作，有反應就代表有連結，冇反應就代表疏離。我當時就係用呢套邏輯去解讀佢，既然我覺得問題係距離，我自然會諗，我應該要做多啲。
於是我會主動同佢玩，同佢講嘢，刻意製造互動，希望可以慢慢拉近。我心入面其實好急，因為如果一個媽媽同自己個BB之間都連唔到，我會覺得呢件事本身就係一個問題，我一定要處理好。
但做落去之後，件事冇變，有時甚至相反，我越主動，佢越快抽離。如果再順住原本嗰套去理解，其實只會得出另一個更難受嘅結論：佢係拒絕我。
但事情又唔完全似我被拒絕，佢嘅反應唔一致，有時接受，有時冇反應，有時抽離，有時又冇推開我，我只係感受到，我入唔到去。
去到呢一步，我開始覺得未必只係建立關係嘅問題。我開始懷疑一件事，會唔會問題唔係佢要唔要我，而係我一直以為我已經喺佢個世界入面，其實未必係。
因為那時我本身係一個幾緊張嘅新手媽媽，當一路處理得好順嘅事情一件一件咁改變時，我就會諗：喺唔喺有啲嘢唔對路呢？
一邊係夜晚，小人仔突然唔肯自己一個瞓，瞓瞓下會醒咗不停喊；但當我同佢一齊瞓之後，佢就晚晚瞓到天光自然醒。另一邊喺學校，佢一開始明明冇乜反應，可以自己喺教室入面周圍玩，但過咗幾個星期之後，佢開始喊住唔肯同我分開，再過一段時間，佢又好似突然穩定返，冇再喊，甚至可以自己同其他小朋友一齊玩。
當時我諗唔明，小人仔身體無問題，我又一路都跟住其他媽媽嘅經驗去做，點解小人仔會咁反覆？
在我四處搵答案嗰段時間，我遇到一個好有經驗嘅幼兒心理學家，同佢傾過小人仔嘅情況之後，佢問咗我一個問題：
「小朋友返學情緒開始穩定，同佢夜晚唔再單獨瞓、亦冇再出現夜哭，時間上係唔係差唔多？」
我呆咗一下，因為我從來無連埋呢兩個事件一齊睇。其實，睡眠問題，同埋學校問題，都喺有著同一個根源——安全感。
之前我一直都深信，有一啲方法係「有效」嘅。
睡眠訓練就係其中一個。無論係書、文章，定係身邊嘅分享，大部分都會話，只要跟住做，小朋友就會慢慢學識自己入睡，生活亦會變得有規律。對父母嚟講，亦確實輕鬆咗。
所以當時嘅我，好自然咁覺得，問題只係我做得夠唔夠徹底，或者有冇跟得夠準。
但當我將小人仔其他方面嘅轉變都對應返時間嚟睇之後，我就有一個唔太舒服嘅感覺。
好似嗰套一直被認為「有效」嘅方法，喺佢身上，並唔係咁單純。
我懷疑問題同方法兩者喺無關，而喺——
我一直都用緊同一個框架去理解小人仔。
但教養，喺唔喺每個小朋皮都用到同一個模式？
被大部分人接受，甚至被當成「應該要咁做」嘅方法，對我個小朋友，都一定適用？
小人仔兩歲左右，開始上學前適應班，每日三個鐘。
一開始，其實我係幾放心。因為當佢大概一歲半多啲，我已經帶佢上過每日一小時嘅遊戲班。當時佢嘅情緒一直都幾穩定，就算我唔喺身邊，佢都可以自己喺教室入面周圍玩。
所以當佢正式上學，我都以為情況會差唔多。
開頭嗰幾個星期，亦真係咁。其他小朋友朝早同照顧者分開會喊，但小人仔冇乜特別反應。我離開教室嘅時候，佢只係望一望我，冇喊，亦冇追出嚟。
但之突然有一日，情況變改晒。
記得嗰日，我同佢道別嘅時候，佢忽然好用力咁捉住我隻手，唔俾我走，開始一路喊一路叫「媽媽」。老師過嚟幫手抱佢入教室，我企喺門外面，仲聽到佢喊住叫我。
之後嘅日子，每朝返學都變成一個固定嘅畫面。佢會肯出門口，但一踏入學校，就開始收埋自己。到我要離開嗰一刻，就會捉住我，喊，唔想我走。嗰段時間，大概持續咗幾個星期。
而我開始覺得奇怪，係因為另一樣嘢。
差唔多同一段時間，小人仔開始唔再肯自己一個瞓。夜晚瞓覺嗰陣，佢會想同我一齊瞓，而當我由得佢咁做之後，夜晚嗰啲突然會醒同喊到唔停嘅情況就消失咗。
同時，學校嗰邊嘅情況又變咗。佢冇再喊住唔俾我離開。
有一日放學嗰陣，我問佢在學校做咗啲乜，佢話：「玩咗一整日。」我再問老師，老師話佢好穩定，冇再喊，仲會同其他小朋友一齊玩。
如果分開睇，每一件事都可以有各自嘅解釋。
但當我將時間對返齊之後，有啲嘢其實會唔會係連埋一齊呢？
之後幾日，我再試過將小人仔放返喺小床瞓等佢自己一個瞓。有幾晚都冇再出現嗰晚咁激烈嘅反應，所以我一度以為，可能只係個別情況。
但慢慢地，另一個現象開始出現。
每隔幾日，甚至一個星期左右，小人仔會喺夜晚瞓咗三、四個鐘之後，突然大哭，而且可以持續好一段時間，都冇辦法自己停落嚟。到最後，我只可以抱佢出嚟，帶佢去客廳，同我一齊瞓，過兩三個鐘之後，佢先會再次入睡。
呢種情況唔係每日發生，但出現嘅時候，都幾明顯，而且同之前嗰種可以自己過渡睡眠循環嘅狀態，其實好唔一致。
慢慢地，我開始冇再堅持一定要佢自己喺房入面瞓。臨瞓前我會先問佢想唔想自己瞓。有時佢無反對，我就俾佢自己一個瞓，但當佢話想同我一齊，我就由得佢瞓喺我身邊。我照樣會同佢講故事，有時我太攰，未講完就瞓著咗，佢都唔會叫醒我。
自始，佢又同我一齊瞓返。
不過，我留意到一樣嘢。
佢之前夜晚一個人瞓嗰啲突然出現、而且持續一段時間都停唔到嘅哭聲，就消失咗。每晚都可以一覺瞓到天光自然醒。
似乎，睡眠訓練呢件事，同我原本理解嘅，有啲出入。
一直以來，小人仔瞓覺都算穩定。直到有一晚，情況突然有啲唔同。
我照平時咁樣，將佢放喺小床，準備離開房間。佢忽然伸出手，望住我，叫咗一聲「媽媽」。我捉住佢隻手，想安撫佢一下，但唔知點解，佢一直拖住我唔放。
其實由八個月開始，到兩歲之前，佢瞓覺都未試過有呢個情況。
我當時第一個反應係，佢可能身體唔舒服，所以就坐喺佢旁邊陪一陣。當我拖住佢隻手嘅時候，我見到佢露出一個好滿足、好安心嘅笑容，嗰種表情，其實唔係成日見到。
我開始覺得，佢唔似係身體有問題。
我同佢講咗一個故事，見佢慢慢開始有睡意，就放開佢隻手，準備照平時咁離開房間。但當我一放開，小人仔就即刻由躺著彈起身，然後開始大哭大叫。
我關上門之後，佢嘅哭聲變得好崩潰。
我喺監察器見到，佢不停跳、搖小床，成個人都好似失控咁。嗰一刻，其實好似返返去佢七個月大，第一次做睡眠訓練嗰晚嘅畫面，只不過，佢已經兩歲，力氣大咗，可以企起身，可以跺腳。
時間一路過去，五分鐘、十分鐘、十五分鐘，佢都冇停過。
我開始有啲驚，甚至會諗，張床會唔會俾佢搖散。最後我開門，抱咗佢出嚟。
嗰一晚，我同佢一齊瞓喺客廳嘅床墊上。
點解明明之前一直都好順嘅事情，會突然間做唔到？我一下子諗唔到答案，但隱約覺得，好似有啲嘢變咗。
而家再睇返轉頭，其實嗰一晚，好似一個訊號。
只係當時，我理解唔到呢個訊號嘅意義。
之後嘅日子，其實過得幾順。兩個星期之後，小人仔開始可以自己入睡，到八個月左右，佢已經可以獨立喺自己房間瞓覺，就算之後返咗香港，呢個習慣都一直維持住。
根據我嘅資料，養成佢自己一個瞓嘅習慣需要一個房間，所以返香港之後，我就留佢一個喺房，我自己喺客廳鋪床墊瞓。當時身邊好多人聽到，都覺得好神奇，會問：
「咁細個已經可以自己瞓？」
「你哋真係好狠得心。」
甚至有人會話，呢個就係所謂嘅「回報」，係好多父母都想要嘅一夜好眠。
而事實上，表面睇，一切都真係好似好咗。小人仔可以自己入睡，夜晚大部分時間都可以瞓到天光，就算間中半夜有少少夜哭，只要由得佢自己喊五至十五分鐘，佢都可以再瞓返。
生活開始變得有節奏，我亦終於可以喺夜晚有一啲屬於自己嘅時間。如果只係睇結果，其實好容易會覺得，呢個方法係有效的，而當時，我都深信不疑。
我仲未知道，有啲嘢，其實已經開始慢慢累積。
當小人仔七個月大時，我哋去英國探望爸爸，順道住三個月，打算睇吓將來會生活嘅地方。英國的家比香港大得多，爸爸亦為小人仔預備咗自己嘅房間。冇咗會打擾外婆同姨姨呢個顧慮，加上爸爸都幾支持要教佢自己瞓，所以到咗英國兩個星期之後，我就開始試幫小人仔做睡眠訓練。
開始嘅時候，其實幾驚心動魄。第一晚我將佢放喺小床，關上房門之後，幾乎即刻就傳出一種好尖嘅哭聲。我坐喺廳，用監察器望住佢，見到佢用盡力伸直全身，不停翻來覆去咁嚎哭。
時間一分一秒咁過，五分鐘、十分鐘、二十分鐘、三十分鐘，其實都幾難頂。直到四十三分鐘左右，佢好似已經筋疲力盡，慢慢停落嚟，最後瞓著咗。
呢四十三分鐘，對我嚟講其實幾煎熬。我望住個畫面，見到嘅唔只係喊，而係一個小朋友自己面對住一種佢未識處理嘅感覺，直到用晒力氣。但同一時間，我又會同自己講，如果而家心軟，之後可能就幫唔到佢學識自己瞓。
之後嘅日子一日一日咁過。每晚瞓之前都會喊，不過時間開始慢慢短咗，由幾十分鐘變成十幾分鐘，再慢慢再短啲。兩個星期之後，好似有個轉變，佢開始可以自己入睡。
當時，我真係覺得，我做對了。
小朋友在學校出現行為問題，其實可能唔只係唔聽話。
當學校同我哋講，小朋友嗰日有「行為問題」，好多人第一個反應喺會諗：小朋友又唔聽話？定係情緒控制得唔好？
我以前都喺咁樣理解。但我漸漸發現，「行為問題」只係表面，入面可能發生緊其他嘅嘢。
有時學校打電話來，只會講一句好簡單嘅說話，例如：「佢今日有啲行為問題。」以前我都係咁理解，直覺就覺得，應該係小人仔唔聽話，或者情緒控制得唔好。
但有一段時間，我開始有另一種想法。唔係單純嘅個別事件，而係有啲情況，好似會自己重複出現，例如學期尾、特別活動，或者要坐定一段時間、跟住一大班人節奏嘅時候，小人仔會特別辛苦。最初我都會諗，呢啲其實都好普通，學校生活本身就係咁，但呢個模式重覆幾次之後，我開始覺得要停一停，細心諗一諗。
對我嚟講係普通，對佢嚟講，又喺唔喺一樣呢？
如果試下站喺佢嗰邊去睇，有啲畫面其實幾清楚：一個環境入面有聲、有規則、有節奏，要跟，要坐定，要安靜；有時又未必完全明白發生緊乜嘢事，但你又唔可以走。對大人嚟講，呢啲都係可以接受嘅安排，但對某啲小朋友嚟講，好似一直有啲嘢喺消耗緊。
我會諗，問題未必係佢唔想配合。有時反而係，會唔會佢其實已經好配合，只係配合到某一個位，就上唔到去。我哋見到嘅，通常都係最後佢崩潰嗰一下。如果將件事拉長少少去睇，好似唔係突然，而係一路累積。
以前我會問：「點解佢又唔聽話？」而家會改問：「佢有乜嘢難處呢？」有啲情況，我未必一下就會理解，但我會先觀察，再搵答案。
如果你都有類似嘅情況，覺得小朋友喺某啲環境特別辛苦，
我其實喺「未明白的時候」，記低過幾個類似嘅片段。
有一段時間，我都試過用方法去處理，例如睡眠、作息等呢啲問題。
但有啲地方，後來我先發現未必係我以為咁簡單。
關於睡眠訓練，我後來先發現嘅一啲事。
我曾經深信，BB一定要做睡眠訓練。特別係一開始，我見小人仔成日都要痴住人，瞓覺又要抱住先瞓，心入面會諗：咁落去，佢之後點樣自己瞓？
所以我睇咗好多資料，問過前輩，知道呢樣嘢一定要下決心先做得到。有一段時間，情況真係好好，我甚至以為，自己已經成功。
但隨著時間，有啲情況開始出現。我開始意識到，事情唔似表面咁簡單。
回頭再看，我才發現，當時忽略咗一樣更重要嘅嘢。
小人仔出世之後，有一段時間，我幾乎冇乜真正休息過。
佢嘅睡眠好碎。每次瞓完一個循環，好快就會醒，通常大概二十分鐘左右。其他小朋友可能會自己再瞓返，但佢唔得，一醒就會喊，要重新抱、重新哄，先可以再入睡。嗰段時間，我覺得自己一直喺一個冇停過嘅循環入面：餵奶、掃風、換片、抱瞓、放低，再醒，再嚟一次。
就算佢大少少，可以隔四個鐘先飲一次奶，情況都冇好轉。反而變成另一個問題，佢瞓覺一定要抱住，唔可以放落床，甚至連抱住嘅姿勢都唔可以郁。
我知道好多人會話，呢啲係「抱慣咗」。而當時嘅我，其實都係咁樣認為。
但現實係，我根本冇太多選擇。我哋同屋企人一齊住，半夜佢一喊，就會影響其他人。我冇可能由得佢一路喊，只可以抱起佢，試住令佢快啲靜落嚟。慢慢地，所有嘢就變成一個循環。
我開始睇好多關於嬰兒睡眠嘅資料。書、文章、各種方法，睇得愈多，好似愈有一個清晰嘅方向。原來係可以「訓練」嘅。
所謂睡眠訓練，大概意思係，當小朋友要瞓覺，就放佢喺自己張床，讓佢喺嗰度慢慢學識自己入睡。中間可能會喊，但唔需要即刻介入，等佢自己調節。
我一路睇，一路覺得，可能呢個就係問題所在。
如果佢學識自己瞓，
如果佢唔再需要人抱，
如果佢可以自己過每一個睡眠循環，
咁係咪所有嘢都會好返？
我當時以為，呢套方法係有用的。甚至覺得，只要照這樣做，事情就會慢慢好起來。
如果你睇到呢度，覺得用緊嘅睡眠訓練開始有啲唔對路，我喺下一篇寫咗當時點樣開始嘗試，以及點解嗰陣時，我會覺得自己做對了。
下一篇：那兩個星期，我以為事情終於解決了 （我開始真正做睡眠訓練）
如果你想由頭到尾睇返整個過程，
我都整理咗成一個睡眠訓練系列，可以慢慢跟住睇落去。